អាមេរិកខាងត្បូង៖ ប្រធានក្រុម Lionel Messi ដែលរកបានគ្រាប់បាល់បញ្ចូលទី ៣គ្រាប់ម្នាក់ឯង ក្នុងជំនួបដែលអាហ្សង់ទីន ឈ្នះបូលីវៀ ៣-០ ក្នុងវគ្គជម្រុះ FIFA World Cup តំបន់អាមេរិកខាងត្បូងព្រឹកមិញនេះ។

អ្វីដែលគួរឱ្យចាប់អារម្មណ៍បំផុត ក្រោយការរកបាន ៣គ្រាប់បន្ថែមនេះបានធ្វើឱ្យ Messi ក្លាយជាកីឡាករដែលបានបំបែកកំណត់ត្រាស្តេចបាល់ទាត់ប្រេស៊ីល Pele ក្លាយជាកីឡាករដែលស៊ុតបញ្ចូលទីច្រើនជាងគេបំផុតក្នុងប្រវត្តិសាស្រ្តទ្វីបអាមេរិកខាងត្បូង។ គួរបញ្ជាក់ថា Pele មានកំណត់ត្រាស៊ុតបញ្ចូលទីឱ្យប្រេស៊ីលបាន ៧៧គ្រាប់ចន្លោះឆ្នាំ ១៩៥៧ ដល់ឆ្នាំ ១៩៧១។ គួរបញ្ជាក់បន្ថែមទៀតចំពោះការធ្វើបាន Hat-Trick យប់មិញនេះ គឺជាការធ្វើបាន Hat Trick លើកទី៧ របស់ Messi សម្រាប់អាហ្សង់ទីន ដោយសរុបទាំងអស់ Messi ស៊ុតបញ្ចូលទី ៧៩គ្រាប់ហើយសម្រាប់ក្រុមជម្រើសជាតិ។

ក្រៅពីជ័យជម្នះ និងភាពរីករាយសម្រាប់ Messi យប់មិញនេះក៏ជាភាពរីករាយបំផុតសម្រាប់អ្នកគាំទ្រអាហ្សង់ទីន ជាពិសេសគឺការអនុញ្ញាតឱ្យចូលទស្សនាការប្រកួតផ្ទាល់ក្នុងកីឡដ្ឋានឡើងវិញ ខណៈ Messi ដែលជាប្រធានក្រុមបានដង្ហែរចូលមកកាន់កីឡដ្ឋាន Monumental នូវពានរង្វាន់ Copa America ដែលទើបតែឈ្នះនាពេលថ្មីៗកន្លងមកនៅមុខទស្សនិកជនប្រមាណ ២១,០០០នាក់ក្នុងកីឡដ្ឋានផ្ទាល់។

ដោយឡែក ងាក​មកចាប់អារម្មណ៍តារាងពិន្ទុវិញ ក្រោយជ័យជម្នះយប់មិញនេះ អាហ្សង់ទីននៅតែបន្តឈរលេខ ២ ក្នុងតារាងពិន្ទុ ដោយមាន ១៨ពិន្ទុ តាមពីក្រោយក្រុមកំពូលតារាងប្រេស៊ីល ៦ពិន្ទុ ខណៈអ៊ុយរូហ្គាយ ឈរនៅលេខ៣ និងអេក្វាដ័រឈរនៅលេខ ៤៕